АДВОКАТУРАНЫҢ ЕҢ ЖОҒАРЫ МАРАПАТЫ — «ҚАЗАҚСТАН АДВОКАТЫНЫҢ АЛТЫН БЕЛГІСІ» НЕЯСОВА НАБИРА МҰРЗАХМЕТОВНАҒА ТАБЫСТАЛДЫ
2025 жылғы 21 қарашада өткен Адвокаттар алқаларының республикалық конференциясы аясында 5 желтоқсан – Адвокатура күніне орай Республикалық адвокаттар алқасының ведомстволық наградалары салтанатты түрде табысталды.
Конференцияға қатысқан және 2025 жылғы 13 қазандағы РАА Төралқасының шешімімен марапаттауға ұсынылған адвокаттарға тиісті наградалар берілді.
Адвокатураның ең жоғары марапаты – «Қазақстан адвокатының алтын белгісі» төсбелгісі Неясова Набира Мұрзахметовнаға табысталды.
Набира Мұрзахметовна – қазіргі қазақстандық адвокатураның қалыптасуына елеулі ықпал еткен тұлғалардың бірі. Алматы қалалық адвокаттар алқасын басқара отырып, ол адвокаттық өзін-өзі басқару институттарын дамытуға, кәсіби стандарттарды нығайтуға және адвокатураның қоғамдық-құқықтық институт ретіндегі орнықты моделін қалыптастыруға терең, жүйелі және ұзақ мерзімді үлес қосты.
Оның басшылығымен алқаның ішкі жұмысын ұйымдастыру, тәртіптік саясат және кәсіби әдеп мәселелеріне қатысты түбегейлі тәсілдер әзірленді. Бұл қағидаттар кейін республикалық деңгейде бүкіл адвокаттық қауымдастық үшін үлгіге айналды. Алматы қалалық адвокаттар алқасы адвокаттардың кәсіби құқықтарын қорғау ісінде, сондай-ақ құқық қолдану тәжірибесінің өзекті мәселелеріне қатысты адвокатураның ұстанымдарын қалыптастыруда бастамашы роль атқарып келеді.
Набира Мұрзахметовна тәуелсіз адвокатура мәртебесінің қалыптасу кезеңінде айрықша рөл атқарды. Дәл сол уақытта институционалдық тұрақтылықты сақтап, өзін-өзі реттеудің заманауи тетіктеріне көшу қажет болды. Оның принципшілдікті басқарудың байыпты да ұқыпты тәсілімен ұштасыра білуі мықты кәсіби ортаны қалыптастырып, дәстүр сабақтастығын сақтауға мүмкіндік берді.
Набира Мұрзахметовнаның тікелей қатысуымен адвокаттық қызмет туралы заңнаманы жетілдіру жөніндегі ұсыныстар дайындалды, сондай-ақ кейін республика бойынша қолданылған жергілікті реттеу тетіктерінің негізі қаланды.
Бүгінде ол адвокаттық қауымдастық өміріне белсенді қатысып, жас буынға бағыт-бағдар беретін, кәсіби беделі жоғары тұлға ретінде өз ықпалын жалғастырып келеді.
«Қазақстан адвокатының алтын белгісі» төсбелгісінің табысталуы – оның Қазақстан адвокатурасының тәуелсіздігін қалыптастыруға, ұйымдық, әдеп және кәсіби негіздерін дамытуға қосқан көпжылдық, терең және жүйелі еңбегінің мойындалуы болып табылады.
