РАА Төралқасы Адвокаттар алқаларының республикалық конференциясын шақыру туралы шешім қабылдады
19 қазанда Республикалық адвокаттар алқасы Төралқасының отырысы өтті. Отырыста 2026 жылғы 21 қарашада Адвокаттар алқаларының республикалық конференциясын шақыру туралы шешім қабылданды.
Конференцияның күн тәртібі жобасы жалпы сипатта, оны әзірлеу әлі жалғасуда. Конференцияда Адвокатураның Тәртіптік комиссиясы төрағасын және жекелеген мүшелерін, сондай-ақ қазіргі құрамның бір бөлігінің төрт жылдық өкілеттік мерзімі аяқталуына байланысты Республикалық адвокаттар алқасы Төралқасының мүшелерін сайлау мәселелерін қарау жоспарланып отыр.
Күн тәртібі жобасына РАА Жарғысына өзгерістер енгізу мәселесі де енгізілді. Бұл өзгерістер негізінен Жарғыны Қазақстан Республикасы Конституциясының адвокатура туралы жаңа 86-бабына сәйкестендіруге байланысты. Аталған бапта алғаш рет адвокатураның азаматтардың сот арқылы қорғалу және заң көмегін алу құқықтарын іске асыруға жәрдемдесудегі рөлі бекітілген. Сонымен қатар, салалық заңның атауын нақтылау және бірқатар редакциялық түзетулер енгізу ұсынылады. Кәсіптік әдебі кодексіне адвокаттардың өз қызметінде жасанды интеллектіні қолдануына қатысты жекелеген өзгерістер енгізу де жоспарланып отыр.
Адвокатураның Тәртіптік комиссиясы төрағасы лауазымына кандидаттарды ұсыну туралы өтініштер Республикалық адвокаттар алқасында 6 қарашаны қоса алғанда қабылданады. 13 қарашаға дейін адвокаттар мен кандидаттардың таныстыру онлайн-кездесуі өтеді.
20 қараша тыныштық күні болып белгіленді. Кандидаттарды қолдауға немесе оларға қарсы үгіт жүргізуге 20 және 21 қарашада, оның ішінде чаттарда, хабарламалар тарату кезінде, әлеуметтік желілерде және көпшілік алдында сөз сөйлеу барысында жол берілмейді.
Төралқа отырысында аумақтық адвокаттар алқаларының шешімдері мен адвокаттардың әрекеттеріне берілген шағымдар да қаралды. Өтініштердің басым бөлігі бойынша Төралқа аумақтық алқалардың шешімдерін өзгеріссіз қалдырып, шағымдарды қанағаттандырудан бас тартты.
Шағымдарды қарау кезінде Төралқа Республикалық адвокаттар алқасы соттардың өкілеттігін алмастыра алмайтынын ескерді. Шағымдардың бір бөлігі сот тәртібімен шешілуге тиіс мәселелерге қатысты болды немесе Республикалық адвокаттар алқасының құзыретіне жатпады. Басқа жағдайларда келтірілген уәждер іс материалдарымен расталмады не тәртіптік жауапкершілікке тарту мерзімі өтіп кетті. Қосымша тәртіптік бағалауды қажет еткен жекелеген материалдар тиісті органдарға қарау үшін жолданды.
