ЖОҒАРҒЫ СОТТА ҚПК-НІҢ 106-БАБЫ ТӘРТІБІНДЕГІ СОТ БАҚЫЛАУЫ МӘСЕЛЕЛЕРІ ТАЛҚЫЛАНДЫ
Қазақстан Республикасының Жоғарғы Сотында Қылмыстық-процестік кодексiнің (ҚПК) 106-бабы тәртібімен прокурор мен қылмыстық қудалау органдарының әрекеттеріне (әрекетсіздігіне) және шешімдеріне берілген шағымдарды қарау жөніндегі сот практикасы мәселелеріне арналған дөңгелек үстел өтті. Іс-шара Жоғарғы Соттың қылмыстық істер жөніндегі сот алқасының төрағасы Назгуль Рахметуллинаның жетекшілігімен өтті.
Талқылауға Жоғарғы Сот пен жергілікті соттардың судьялары, Бас прокуратураның, Ішкі істер министрлігінің, Қаржылық мониторинг агенттігінің өкілдері, Кәсіпкерлердің құқықтарын қорғау жөніндегі уәкіл, сондай-ақ адвокатура өкілдері қатысты.
Республикалық адвокаттар алқасы атынан РАА Төралқасының мүшелері Сисенбай Дельманов, Анара Кусаинова және Игорь Вранчев қатысты.
Талқылау барысында РАА өкілдері ҚПК-нің 106-бабы бойынша шағымданудың қолданыстағы тетігі сотқа дейінгі сатыдағы сот бақылауының тиімділігін едәуір шектейтінін және іс жүзінде қорғау тарапының құқық бұзушылықтарға уақтылы ден қою мүмкіндігінен айыратынын атап өтті.
Атап айтқанда, РАА жасырын тергеу әрекеттеріне және өзге де процестік шешімдерге шағымдану мерзімдерін есептеу мәселесіне назар аударды. Адвокатураның пікірінше, мерзім тек тұлғаның өзіне хабарланған сәттен бастап қана емес, сондай-ақ тиісті әрекет туралы қорғаушыға белгілі болған кезден бастап та есептелуі тиіс. Әйтпесе, қорғау тарапы алдын ала тең емес жағдайда қалады.
Сондай-ақ РАА өкілдері ҚПК-нің 106-бабы тәртібімен сот бақылауына жататын мәселелер тізбесін кеңейту қажеттігін атап өтті. Оның ішінде дәлелдемелерге жол беру, бұлтартпау шараларының заңдылығы және процеске қатысушылардың құқықтарын қорғаудың өзге де маңызды аспектілері бар. Мұндай бұзушылықтарды бағалауды тек істі қарау сатысына ауыстыру көбінесе сот қорғауын кешіктіріп және көбінесе формалды ететіні атап өтілді.
Дөңгелек үстел барысында қатысушылар қылмыстық істі тоқтату туралы қаулыларға шағымдану, шағымдардың соттылығы, тергеу судьялары қаулыларының орындалуы және құқық қолдану практикасының өзге де проблемалық мәселелерін талқылады.
