РАА МЕН ИСЛАМАБАД ЖОҒАРҒЫ СОТЫ АДВОКАТТАР ҚАУЫМДАСТЫҒЫ АРАСЫНДА ОНЛАЙН-КЕЗДЕСУ ӨТТІ
Қазақстан Республикасының Пәкістан Ислам Республикасындағы Елшілігінің белсенді қолдауымен Республикалық адвокаттар алқасының (РАА) өкілдері мен Исламабад Жоғарғы соты адвокаттар қауымдастығының басшылығы арасында онлайн-кездесу өтті.
Кездесуге Қазақстан Республикасы тарапынан Республикалық адвокаттар алқасының төрағасы Мади Мырзағараев және РАА төрағасы орынбасарының міндетін атқарушы Аманжол Мухамедьяров қатысты. Сондай-ақ талқылауға Қазақстан Республикасының Пәкістан Ислам Республикасындағы Төтенше және Өкілетті Елшісі Ержан Сансызбайұлы Қыстафин қатысты.
Кездесу барысында қазақстандық тарап Қазақстандағы адвокатура жүйесін, Республикалық адвокаттар алқасының құқықтық мәртебесі мен функцияларын, сондай-ақ халықаралық кәсіби ынтымақтастықты дамыту бағыттарын қоса ала отырып, негізгі қызмет бағыттарымен қысқаша таныстырды.
Исламабад Жоғарғы соты адвокаттар қауымдастығының өкілдері қауымдастықтың ұйымдық құрылымы мен қызметінің негізгі бағыттары туралы айтып, РАА-мен тікелей өзара іс-қимыл орнатуға қызығушылық білдірді.
Талқылау барысында тараптар Исламабад Жоғарғы соты адвокаттар қауымдастығы мен Республикалық адвокаттар алқасы арасында ынтымақтастық туралы меморандум жасасу ниеттерін білдірді. Ықтимал өзара әрекеттестік нысандары ретінде тәжірибе алмасу, бірлескен семинарлар, дөңгелек үстелдер және сараптамалық іс-шаралар өткізу атап өтілді.
Кездесу қорытындысы бойынша тараптар тұрақты кәсіби диалогты дамытуға өзара мүдделілігін растады және ынтымақтастықтың практикалық аспектілерін пысықтау үшін байланыстарды жалғастыруға келісті.
