РКА ПРЕЗИДИУМЫНЫҢ МҮШЕСІ ЕШМҰХАМЕТ ШИКТЫБАЕВ «ҚОСТАНАЙ» ТЕЛЕАРНАСЫНДА ЖАҢА КОНСТИТУЦИЯ ЖОБАСЫНЫҢ ЕРЕЖЕЛЕРІН ТҮСІНДІРДІ
Қостанай облыстық адвокаттар алқасының адвокаты, Адвокаттардың құқықтарын қорғау жөніндегі комиссияның мүшесі және Республикалық адвокаттар алқасы Президиумының мүшесі Ешмұхамет Төлебайұлы Шиктыбаев «Қостанай» телеарнасындағы «Тема» бағдарламасына қатысып, Қазақстан Республикасының жаңа Конституциясы жобасына қатысты кеңейтілген сұхбат берді.
Эфир барысында елдің Негізгі заңына ұсынылып отырған негізгі өзгерістер, олардың құқықтық жүйеге және азаматтардың құқықтарын қорғау институтына ықпалы жан-жақты талқыланды.
Сұхбатта Конституция жобасының 86-бабына ерекше назар аударылды. Аталған бапта адвокатураның конституциялық мәртебесі айқындалған. Ешмұхамет Төлебайұлы адвокатураның рөлін Конституция деңгейінде бекіту азаматтардың сот арқылы қорғалу және білікті заң көмегін алу құқығының кепілдіктерін нығайтудың маңызды қадамы екенін атап өтті. Оның айтуынша, бұл норма адвокатураның тәуелсіз құқықтық институт ретіндегі институционалдық маңызын айқындап, заң үстемдігін қамтамасыз етудегі рөлін күшейтеді.
Бағдарлама аясында адвокаттардың қызметі, олардың қылмыстық, азаматтық және әкімшілік сот ісін жүргізудегі орны, сондай-ақ тәуелсіздік пен кәсіби жауапкершілік қағидаттары жөнінде түсіндірмелер берілді.
Сонымен қатар, Ешмұхамет Шиктыбаев Республикалық адвокаттар алқасының қызметі, оның негізгі міндеттері мен функциялары, адвокаттардың кәсіби құқықтарын қорғау және еліміздегі адвокаттық қауымдастықты дамыту бағытындағы жұмыстары туралы баяндады.
